قبائل بدائية مازالت موجودة لحد النهاردة

 لو بصينا في آخر إحصائية عن عدد سكان الأرض هنلاقي عددنا ما يقارب الـ 8 مليار نسمة، وتقريبًا أكتر من نص الكوكب متصليين بالإنترنت وأنت تقدر إنك تتواصل مع أي شخص من الـ4 مليار دول وأنت قاعد في مكانك.

الأمر اللي بيكون من الصعوبة معاه أننا نستوعب إن فيه أشخاص على الرغم من التقدم التكنولوجي اللي بنعيشه، لسه لحد وقتنا ده بيعيشوا زي أسلافنا القداماء قبل آلاف السنين، وكتير منهم معندهمش أي فكرة تمامًا عن وجود عالم خارجي من الأساس.

وعلى الرغم من أن تم اكتشاف عدد كبير من القبائل المنعزلة إلا أننا لحد اللحظة دي في عدد غير معلوم من القبائل اللي بتعيش في عصور ما قبل الحداثة.

قبائل الأمازون Amazon tribes

97 % من القبائل البدائية والمعزولة بشكل كبير عن العالم والحضارة اللي بنعيشه، موجودين في قارة أمريكا الجنوبية، وتحديدًا في غابات الأمازون المطيرة.

حوالي أكتر من 100 قبيلة عايشين بطقوسهم المميزة وثقافتهم الخاصة اللي لو بصيت عليها من بعيد هتحس إنك بتتفرج على فيلم وثائقي عن العصور الحجرية، والقبائل دي في تنوع رهيب بينها وبين بعضها في كل شئ تقريبًا.

وعن التنوع بين القبائل فهنلاقي أكبر القبائل زي قبيلة “توكانا Tucuna” واللي بيوصل عدد أفرادها لـ50 ألف شخص، وقبائل تانية من فرد واحد فقط؛ وده لأن في التمانينات وبعد محاولات من بعض الحكومات في قطع الأشجار تم القضاء على قبيلة بالكامل واللي تبقى من القبيلة بأكملها هو شخص واحد وبيعيش حاليًا منعزل تمامًا، وحيد، بيرفض تمامًا أي تواصل مع أي حد غريب، وأُطلق عليه “رجل الحفرة the man of the hole”.

وعن أشهر القبائل في منطقة غابات الأمازون فهتكون قبيلة “اليانومامي Yanomami”، قبيلة اليانومامي واللي بتعتبر أكبر قبيلة معزولة نسبيًا في أمريكا الجنوبية، وبيعيش سكان القبيلة في الغابات المطيرة والجبال في شمال البرازيل وجنوب فنزويلا، وزي معظم القبائل في القارة فمن المرجح جدًا أن السكان يكونوا هاجروا عن طريق مضيق بيرينغ الموجود بين آسيا وأمريكا من حوالي 15 ألف سنة، وشقوا طريقهم ببطء لأمريكا الجنوبية.

وبيبلغ عدد سكان القبيلة لحوالي 38000 شخص، ومساحة أراضي اليانومامي في البرازيل بتوصل لأكتر من 90 ألف كيلومتر مربع والمساحة دي تقريبًا ضعف مساحة سويسرا، وفي فنزويلا بيعيش شعب اليانومامي في حوالي 80 ألف كيلومتر مربع.

ومن الملفت للانتباه إن شعب القبيلة بيعيشوا في منازل دائرية كبيرة يطلق عليها “يانوس yanos” أو “شابونوس shabonos”، والمنازل دي بتقدر تستوعب في بعض الأحيان أكتر من 400 شخص، والمنطقة المركزية في وسط المنازل بيستخدموها في إقامة احتفالاتهم وأعيادهم وطقوسهم الخاصة.

وشعب يانومامي زيه زي معظم شعوب قبائل الأمازون بيجيدوا الصيد بكل أشكاله وأنواعه، لكن في قبيلة اليانومامي الوضع مختلف حبيتين، فمفيش صياد هياكل من لحم الفريسة اللي هو اصطادها، لكن اللي بيتم أن الصيادين بيتبادلوا الفرائس بينهم وبين بعض، وكل صياد وأسرته ياكلوا فريسة صياد تاني.

وعن النساء في القبيلة مهمتهم بتكون زراعة المحاصيل، واللي بيعادل 80% من طعام القبيلة كلها، وكمان بيجمعوا المكسرات والمحار ويرقات الحشرات والعسل البري، وبفضل معرفتهم القوية بالنباتات فبيستخدموا تقريبًا أكتر من 500 نبتة للأغذية والأدوية وبناء المنازل.

قبيلة كورواي Korowai tribe

في سنة 1974 تم اكتشاف واحدة من أكتر القبائل بدائية في العالم، والقبيلة دي هي قبيلة كورواي، وقبل التاريخ ده القبيلة كانت منعزلة تمامًا عن العالم الخارجي.

بيعيش سكان كوروواي في منطقة غابات بتبعد حوالي 150 كيلومتر عن بحر أرافورا، وتحديدًا في جنوب شرق بابوا الغربية في مقاطعة بابوا الإندونيسية، وعدد سكان القبيلة في حدود 3000 شخص وبتعتبر القبيلة حتى وقتنا ده مستقلة تمامًا، فمعظم السكان بيجيدوا الصيد وبينتجوا الفؤوس من الحجر وبيصنعوا الملح وعندهم خبرة كبيرة كمان في مجال الزراعة، وأول أموال دخلت للقبيلة كانت عن طريق المبشرين.

ولو اتكلمنا عن شكل الحياة داخل القبيلة فمن أكتر الأشياء المعروفة عنهم، إنهم قدروا يبنوا بيوتهم على الأشجار وبرعوا جدًا في ده، وبتوصل ارتفاعات المنازل في بعض الأحيان ممكن توصل لأكتر من 30 متر فوق سطح الأرض، ومش معنى أنهم بانيين بيوتهم فوق الأشجار إن ده يمنعهم أنهم يقسموا بيتهم زي ما يحبوا؛ لأن بيوصل في بعض الأحيان إن منازلهم تكون مقسمة لغرفتين أو 3 غرف.

وأغرب حاجة ممكن تسمعها عن قبيلة كورواوي إنها من أكلي لحوم البشر، لكن الغريب أكتر أن شعب قبيلة كورواي مبيكلوش لحوم البشر بهدف الغذا والجوع وكل ده، لكن الموضوع عندهم مختلف تمامًا.

الأمر بالنسبالهم مرتبط بشعائر مقدسة وأنهم بيقتلوا ويأكلوا السحرة الذكوراللي بيطلقوا عليهم “خـاخـوا”، أو إن أكل لحوم البشر يدخل ضمن واحد من العقوبات لأي جُرم في القبيلة، فعلى سبيل المثال بيقتلوا المذنبين في جرائم زي السرقة والقتل والزنا وأي أمور متعلقة بالسحر زي ما ذكرنا، وفي الحالة دي بيتم تقسيم أجزاء جسم الشخص المذنب بين العشيرة كلها وبعدين يبدأوا في أكله.

وفي عام 2006 قدر فريق تلفزيوني إنهم يصورا برنامج ولمدة 60 دقيقة، وكان بيعرض قتل شخص من مجتمع كوروواي تمت معاقبته لكونه “خاخوا” أو ساحر واتعرض للتعذيب والإعدام وأخيرًا الأكل، لكن العادة دي من طقوسها ومعظم اللي زاروا القبيلة قالوا إنها إنها بدأت تختفي تمامًا بين أفراد القبيلة.

قبيلة سينتينيل The Sentinelese

في جزيرة North Sentinal Island واحدة من جزر Andaman في المحيط الهندي، بتعيش أغرب قبيلة على وجه الأرض، قبيلة “سينتينيل Sentinelese”، وبُيقدر عمر القبيلة بـ 60 ألف عام، وقدرت القبيلة إنها تحجب نفسها تمامًا عن العالم الخارجي لدرجة إن مش معروف ولا مؤكد بالنسبة لنا أعداد أفراد القبيلة، إلا أن الباحثين وضعوا تخيل للأعداد إنها من 40 لـ 500 شخص مش أكتر؛ وده بسبب عنف القبيلة ضد أي شخص هيفكر أو يحاول إنه حتى يقرب من الجزيرة.

وبيعيش أفراد القبيلة بين الغابات الكثيفة، الأمر اللي زود من صعوبة إننا نقدر نعرف عن حياتهم وثقافتهم ولغتهم، بس إحنا نعرف 3 أشياء مؤكدين عن قبيلة سينتينيل وهما، وحشية وعنف القبيلة، وإنهم بيعيشوا على صيد الأسماك وجمع الفاكهة، وأخيرًا إنهم ميعرفوش أي شئ تمامًا عن الزراعة، لكن عنف القبيلة ممنعش تمامًا العلماء وبعض الفضوليين من إنهم يحاولوا يعرفوا أكثر عن قبيلة سينتينيل.

لكن للأسف معظم المحاولات دي فشلت وبشكل دموي في كتير منها، ومن ضمن الحوادث دي، في صيف عام 1867 تحطمت السفينة التجارية الهندية “نينوى the Nineveh” ووصل حوالي 86 راكب و 20 من أفراد الطاقم للشاطئ، وفي اليوم التاني وعلى لسان اللي نجوا من الحادث ذكروا أنهم تعرضوا لهجوم وحشي من أفراد القبيلة.

ومن ضمن الحوادث الغريبة إن في عام 2004 وبعد حادث زلزال تسونامي قررت الحكومة الهندية أنها ترسل مروحيات هليكوبتر فوق الجزيرة عشان يطمنوا عن أفراد القبيلة، لكن أفراد القبيلة بدأوا يرموا السهام على الطائرة لما بدأت تقرب من أرض الجزيرة.

ومن أجدد الحوادث اللي حصلت على أرض الجزيرة، هي مقتل المواطن الأمريكي “جون ألين تشاو” بعد عدة محاولات منه للتبشير في الجزيرة كان أخرها في 2018، واللي كان تمنها حياته.

وعن عنف ووحشية أفراد القبيلة ضد أي غريب بيحاول يقرب، فبيعتقد إن سببه حادثة تمت في 1880 لما قرر ضابط من البحرية البريطانية إنه يأخد فردين بالغين من القبيلة ونقلهم لـ” بورت بلير”، لكن بعد فترة مش كبيرة الشخصين البالغين للأسف كانوا توفوا؛ بسبب مرض نقص المناعة، والأربعة رجعوا تاني للجزيرة، واعتقد طبعًا كل اللي على الجزيرة أنهم اتقتلوا ويمكن ده هو سبب العداوة الشديدة ضد أي غريب.

ليه ميعيشوش معانا

وأخيرًا لو جينا سألنا نفسنا سؤال، هو ليه القبائل البدائية اللي اتكلمنا عنها وغيرها كتير من القبائل لحد وقتنا ده ومع كل التطور في وسائل الاتصال المتاحة لسه منعزلين وبعيد عننا تمامًا؟، فهنلاقي الإجابة بتكمن في أن معظم حكومات الدول اللي بيوجد فيها القبائل قررت إنها تسبهم في حالهم، والقرار ده مجاش من يوم وليلة، فبالفعل كان فيه محاولات كتير بالتواصل معاهم، لكن للأسف أن معظم إن لم يكن كل المحاولات إنتهت بكوارث.

فعلى سبيل المثال في عام 1492 لما بدأ الأوروبيون بالوصول بأعداد كبيرة للعالم الجديد وده من بعد اكتشاف كولومبوس المزعوم، فـ اللي حصل إن من 80% إلى 95% من السكان الأصليين للأمريكتين في أقل من 150 سنة توفوا؛ والسبب في الغالب كان انتشار أمراض زي الحصبة والجدري اللي الأوروبيين كانوا حامليين ليها، وطبعًا مكنش عند السكان الأصليين اللي عاشوا منفصلين عن العالم لآلاف السنين المناعة المتطورة اللي تقدر تقاوم الأمراض دي، ده بالإضافة أن المواجهات الأولى مع القبائل المنعزلة دايمًا بتكون نتيجتها العنف.

وعشان الأسباب دي مجتمعه قررت الحكومات إنها متتواصلش مباشرة مع القبائل المنعزلة، لكنها من حين لآخر بترسل رحلات جوية عشان تطمن على أعدادهم وأدائهم، والموضوع متوقفش على أداء الحكومات وقرارتها وبس، لكن بتسعى بعض المنظمات الدولية زي منظمة Survival International، ومؤسسة FUNAI التابعة للحكومة البرازيلية، وغيرهم من المجموعات المناصرة لحماية القبائل الضعيفة من أي تدخل من الأشخاص أو الحكومات في شئون حياتهم أو التعدي عليهم.