ليه الصلع بيحصل دايما من مقدمة الرأس مش من الأجناب؟

 أي حد لما بيكون عنده صلع، فبنسبة كبيرة بنلاحظ إن الصلع ده بيحصل من فوق فقط، لكن الأجناب وخلفية الرأس من ورا بيكون فيهم شعر عادي جدًا، فـ ياترى ليه الحالة دي هي الأكثر إنتشارًا في حالات الصلع دونًا عن غيرها، وليه بنشوف بعض الأشخاص بيكون عندهم صلع بشكل كامل وأشخاص تانية لأ، والأهم من كده ليه الصلع مرتبط بالتقدم في السن، يعني ليه معظم الناس لما بتكبر في السن بنلاحظ عليهم علامات الصلع وفقدان الشعر؟

الصلع والوراثة

خلينا في البداية نفهم هو ليه الصلع بيحصلنا أصلاً ،وليه بيبقى موجود عند الرجالة بس مش الستات؟، والحقيقة الموضوع ده متوقف على عدة عوامل، أول وأهم عامل فيهم هو الوراثة، الإنسان بيمتلك 46 كرموسوم، وعلشان يتحدد نوعه إذا كان ذكر أو أنثى، فالموضوع بيعتمد بشكل رئيسي على الكرموسومين إكس (X) و واي (Y)، فلو هو ذكر، فده هيخليه يمتلك كرموسوم إكس وكرموسوم واي – وتبقى الصيغة (XY)، ولو أنثى فهتمتلك كرموسومين إكس – وتبقى الصيغة (XX).

الشاهد في الموضوع بقى، إن الجين اللي بيأثر على فقدان الشعر، بيكون دايمًا موجود على الكرموسوم إكس (X) فقط؛ وعلشان كده لو فيه بنت وارثة الجين ده من أبوها، وبعدين إتجوزت، فـ الجين ده بيفضل محمول على أحد كرموسومات إكس (X) بتوعها، وبتورثه لأطفالها، ونسبة ظهور الجين دا في الأطفال، بيتحدد بناءًا على جنسهم، وللأسف الذكور بيتظلموا أكتر في التقسيمة دي؛ وده لأن الطفل علشان يبقى ذكر فهو محتاج يحصل على الصيغة (XY) زي ماقولنا، وده بيجبره إنه ياخد من الأم كرموسوم (X) اللي إحتمال يبقى فيه الجين المصاب بتاع الصلع، وياخد من الأب الكرموسوم (Y) ، ومفيش قدامه أي تقسيمة تانية غير كده؛ وده لأنه لازم ياخد نص كروموسوماته من الأب والنص التاني من الأم.

طب ليه الطفل الذكر ماياخدش من أبوه كروموسوم (X) السليم وخلاص؟، الإجابة ببساطة هي إن الطفل لو أخد كروموسوم (X) من أبوه، فلما يجي ياخد نص كروموسوماته من أمه مش هيلاقي عند الأم غير كروموسومات (X) فقط.

جين فقدان الشعر يعتبر جين مُتنحى أو Recessive gene؛ ولأن الذكور عندهم كروموسوم إكس (X) واحد فقط ومفيش كروموسوم إكس تاني بينافسه، فده بيخلي نسبة ظهور الجين عند الذكور تبقى عالية جدًا وتوصل لـ 50%؛ وعلشان كده لو الجد من ناحية الأم عنده صلع، ف بنسبة 50% الإبن ممكن يحصله صلع هو كمان، أما بقى عند البنات فالموضوع بيكون مختلف تمامًا.

البنات بيبقى عندهم اتنين من الكروموسوم إكس (X)، فلو واحد فيهم مُصاب، التاني بيبقى سليم؛ وعلشان كده الجين المُتنحى في الحالة دي بيبقى ضعيف ومابيقدرش يعبر عن نفسه بسهولة، والحالة الوحيدة اللي ممكن الجين ده يظهر ويسود فيها عند البنات، هي إنه لازم يبقى فيه منه نسختين موجودين في نفس الوقت، يعني كل كرموسوم إكس (X) من اللي عند البنت يبقى مُصاب وبيحمل جين فقدان الشعر، ودي طبعًا حالة بتبقى نادرة جدًا وإحتمالاتها قليلة، وعلشان كده الصلع بيبقى شائع عند الذكور أكتر من الإناث.

وخلينا هنا برده نوضح نقطة علشان لو جت على بال حد، وهي إحنا ليه بنقول لو الجد من ناحية الأم عنده صلع ف إحتمال كبير إن ده يتورث للأحفاد؟، يعني ليه مثلاً مابنقولش الجد من ناحية الأب؟، والإجابة هي إن الجد من ناحية الأم علشان يخلف الأم واللي هي بين قوسين (بنت) فده معناه إنه هيديها كرموسوم إكس (X) بتاعه، وبالتالي لو هو عنده جين فقدان الشعر، فهينقل الجين ده لبنته، والبنت تنقله لأحفاده.

أما الجد من ناحية الأب، فعلشان يخلف الأب اللي هو بين قوسين (ذكر) فده معناه إنه هيديله كروموسوم (Y) بتاعه فقط، وزي ماقولنا من شوية، إن جين فقدان الشعر مابيبقاش موجود غير على كروموسوم إكس (X)؛ وعلشان كده حتى لو الجد من ناحية الأب عنده صلع ، فمش هينقل ده لأولاده الذكور.

ليه فوق تحديدًا ومش الأجناب؟

دلوقتي بقى بعد ما عرفنا الصلع بيحصل إزاي، وإشمعنى الذكور بالذات، خلينا ننتقل للجزئية المهمة اللي بعد كده وهي إن ليه الصلع بيحصل دايمًا من فوق والمقدمة ومش من الأجناب؟، النمط ده من الصلع بيطلق عليه إسم (الصلع الذكوري أو Male pattern baldness)، ودايمًا في الرأس بياخد شكل حرف M أو حرف U مقلوب؛ والسبب في حدوث الموضوع ده راجع بشكل أساسي للهرمونات، وتحديدًا مجموعة هرمونات الأندروجين Androgen.

الأندروجين هو الإسم العام لمجموعة من الهرمونات اللي بتنظم الخصائص الذكورية في جسمنا، زي مثلاً زيادة كتلة العضلات والعظام، ونمو الشعر وخشونة الصوت وغيرهم، والهرمونات دي زي التستوستيرون، والأندروستينديون Androstenedione، والديهدروتستوستيرون Dihydrotestosterone أو الـ DHT، المشكلة كلها بقى بتكمُن في الهرمون الأخير ده – الـ DHT.

هرمون الديهدروتستوستيرون أو الـ DHT بالرغم من إن ليه دور مهم جدًا في إبراز الصفات الجنسية عند الذكور، إلا إن تواجده في الجسم بكميات كبيرة بيأثر بالسلب على بُصيلات الشعر الموجودة في الرأس، الهرمون ده لما بيتواجَد بشكل مُكثف، بيلتصق بقاعدة الشعر من تحت وبيخنق المنطقة بتاعت البُصيلة تمامًا، اللي الشعر في الأساس بينبُت من خلالها، وده بدوره بيخلي الشعر ينكمش، ويقصر بشكل تدريجي، ومع مرور الوقت بتبدأ البصيلات تنتج شعر ضعيف، وبينمو لفترات زمنية أقل من الطبيعي، لحد مابنوصل لمرحلة معينة وبتتوقف البُصيلة عن إنتاج الشعر أصلاً، وبتسيب المنطقة اللي حواليها ملساء ومافيهاش أي شعر، وعلشان كده معظم الأشخاص اللي عندهم صلع، فده بيكون بسبب إن هرمون الديهدروتستوستيرون موجود في جسمهم بكميات أكبر من الطبيعي، أو إن البُصيلات بتاعت شعرهم عندها حساسية تجاه الهرمون دا.

وخلال فترة البلوغ تحديدًا، بتبدأ الجمجمة وعضلات الجبهة والرقبة ينمو بشكل مُكثف؛ وعلشان كده في المرحلة دي بيحصل توتر في شريط الأنسجة الأمامي اللي بيبقى موجود فوق جبهة الرأس بالظبط، والتوتر اللي في الأنسجة والعضلات ده، بيكون عامل مهم في جذب كمية كبيرة من هرمون الـ DHT للمنطقة، وبالتالي ده بيخنق بصيلات الشعر الموجودة في المكان، وبيمنع عنها إمدادات الدم والعناصر الغذائية اللازمة، وده بدوره بيخلي الشعر يختفي الأول من ناحية جبهة الرأس، وبعدين يتراجع للخلف بشكل تدريجي.

ووفقًا لجمعية تساقط الشعر الأمريكية the American Hair Loss Association، فالحالة اللي بينتكلم عنها دي، هي السبب في 95% من حالات الصلع وفقدان الشعر عند الرجال.

ليه الأنماط الأخرى بتحصل؟

طيب دلوقتي فيه أنماط أو أشكال تانية من الصلع بنقابلهم في حياتنا، والموضوع مش متوقف فقط على على شكل حرف الـ M أو حرف الـ U.

فيه مثلاً الأشخاص اللي بيبقى عندهم صلع على شكل دائرة في مؤخرة الرأس، أو الأشخاص اللي عندهم صلع بشكل كامل، أو الأشخاص اللي عندهم صلع في أماكن متفرقة من الدماغ وغيرهم، فبالنسبة للأشخاص اللي الصلع عندهم بيكون على شكل دائرة في نهاية الرأس، الموضوع ده بيكون راجع لنفس أسباب الصلع اللي من نمط الـ M والـ U بالظبط، بس الفرق الوحيد هو إن منطقة نهاية الرأس في الحالة دي بتنمو أكتر من الجبهة، وبالتالي بتجذب هرمون الـ DHT بشكل أكبر، وبناءًا عليه بيبدأ فقدان الشعر عندهم ينتقل من ورا لقدام.

أما بقى الصَلع الكامل، فهو في البداية بيبقى صلع جزئي عادي جدًا زي أي نوع من الأنواع اللي فاتت، ولكنه بيكون نشط أكتر، وبيمتد تدريجيًا لحد ما يستحوذ على فروة الرأس بالكامل.

وأخيرًا بقى الحالة اللي بيحصل فيها فقدان للشعر من أماكن عشوائية أو مُتفرقة في الجسم، زي فروة الرأس والدقن أو حتى الرموش والحواجب، فدي بيُطلق عليها “الصلع البُقعي أو داء الثعلبة Alopecia areata”.

والحالة دي بتبقى نوع من أمراض المناعة الذاتية؛ لأن جهاز المناعة نفسه هو اللي بيهاجم الشعر وبيخليه يتساقط، وبيسيب مكانه بقع مستديرة وناعمة، بس في العادة في الحالات اللي زي كده، الشعر بيرجع ينمو مرة تانية لما جهاز المناعة يستقر ويرجع لوضعه الطبيعي.

ومن الجدير بالذكر إن فقدان الشعر ممكن كمان يحصل بعيدًا عن الوراثة أو إضطراب الهرمونات، ويكون بسبب عوامل أو مؤثرات خارجية، العمر والعوامل البيئية والنظام الغذائي، وحتى الإجهاد والتوتر وعادات النوم الخاطئة والتدخين، ممكن يكونوا سبب في إن الشخص يفقد شعره، كمان بعض الأمراض زي فقر الدم أو مشاكل الغدة الدرقية.

مفارقة نمو الذقن

أخيرًا بقى خلينا نذكر مُفارقة غريبة جدًا، وهي إن تقريبًا معظم الناس اللي عندهم صلع في الرأس، بتكون دقنهم كثيفة جدًا، فـ ياترى إيه السبب في الظاهرة الغريبة دي؟

السبب ببساطة راجع لنفس الهرمون ألا وهو الـ DHT هرمون الديهدروتستوستيرون بيأثر على مناطق معينة في الجسم، ولكنه بيعزز نمو الشعر في مناطق تانية؛ وعلشان كده بيتسبب في تساقط شعر الرأس، ولكنه في نفس الوقت بيعزز من نمو شعر اللحية أو شعر الوجه بشكل عام، وده اللي بيخلينا نشوف الأشخاص اللي عندهم صلع، دقنهم كثيفة جدًا.

في النهاية الصلع الذكوري هو شيء شائع جدًا، لدرجة إن الدراسات بتقول إن 50% من الأشخاص اللي في عمر الأربعين بيظهر عليهم مستوى ملحوظ من مستويات الصلع، وكل الناس بتتقدم في السن، كل ما النسبة دي بتزيد أكتر، فمتقلقش ولا تشيل هم.